Toshkent, O‘zbekiston (UzDaily.uz) — 27 fevral kuniToshkentda O‘zbekiston Savdo-sanoat palatasi raisi Davron Vaxabov va Italiya Respublikasining O‘zbekistondagi Favqulodda va muxtor elchisi Pergabriyele Papadia de Bottini raisligida ilk bor Italiya-O‘zbekiston biznes-nonushtasi bo‘lib o‘tdi.

O‘zbekiston va Italiya o‘rtasidagi tovar ayirboshlash hajmi 437,9 mln AQSH dollarini tashkil etadi. Shu jumladan, O‘zbekistondan Italiyaga eksport qilingan tovarlar va xizmatlar hajmi 44,6 mln dollar, Italiyadan O‘zbekistonga import qilingan tovarlar va xizmatlar hajmi esa 393,4 mln dollarga yetdi.

Tadbirda ikki mamlakat o‘rtasida eksport-import aloqalarini amalga oshiruvchi O‘zbekiston va Italiyaning yetakchi kompaniyalari, shuningdek, Italiyaning O‘zbekistonda faoliyat yuritayotgan biznes missiyalari va vakolatxonalari vakillari ishtirok etdi.

Ular orasida “PROCAB” MCHJ, "BMB GROUP" MCHJ, “DAKA-INTEX” MCHJ, Toshkent metallurgiya zavodi, PODIUM ITALIA, NEW MILLENNIUM, MEDEXPORT ITALIA, NATUZZI, FIAT va boshqa yirik kompaniyalar ishtirok etdi.

Uchrashuvda ikki tomonlama savdo-iqtisodiy hamkorlikni kengaytirish, biznes uchun qulay sharoitlar yaratishning dolzarb masalalari, shuningdek, iqtisodiyotning turli tarmoqlarida o‘zaro hamkorlikning istiqbolli yo‘nalishlari muhokama qilindi.

Ishtirokchilar o‘z tajribalari bilan o‘rtoqlashadilar, ishbilarmonlik muhitini yaxshilash bo‘yicha takliflar kiritadilar va o‘zaro manfaatli aloqalarni yana-da rivojlantirishga qaratilgan tashabbuslarni ilgari suradilar.

Biznes yuritish jarayonida tadbirkorlar duch keladigan dolzarb masalalarni hal etish, shuningdek, ikki mamlakatning davlat va tarmoq tuzilmalari tomonidan qo‘llab-quvvatlash mexanizmlarini muhokama qilishga alohida eʼtibor qaratildi.

Ushbu biznes-nonushta O‘zbekiston va Italiya ishbilarmon doiralari o‘rtasidagi ikki tomonlama muloqotni mustahkamlash uchun muhim platforma bo‘lib, mamlakatlarimiz o‘rtasidagi savdo-iqtisodiy aloqalarni chuqurlashtirishga xizmat qiladi.

O‘zbekiston Savdo-sanoat palatasi 2025 yilda boshqa diplomatik vakolatxonalar vakillari bilan ham shunday biznes nonushtalarini o‘tkazishni rejalashtirmoqda. Bunday format xalqaro ishbilarmonlik hamkorligini rivojlantirish va mamlakatda investitsiya muhitini mustahkamlash uchun yangi imkoniyatlar yaratadi.