Toshkent, O‘zbekiston (UzDaily.uz) — «Manchester Siti» bosh murabbiyi Xosep Gvardiola Angliya Premer-ligasining 24-turidan o‘rin olgan «Arsenal»ga qarshi bahs oldidan markaziy himoyachi Abduqodir Xusanovning ruhiy holati haqida gapirdi.

Eslatib o‘tamiz, Xusanov avvalgi turda «Chelsi»ga qarshi o‘yinni asosiy tarkibda boshlagan, bir golga sababchi bo‘lgan va sariq kartochka olgan edi. Shunday bo‘lsa-da, «shaharliklar» ushbu o‘yinda 3:1 hisobida g‘alaba qozondi, uzbekistonlik himoyachi esa 52-daqiqada maydonni tark etdi.

Gvardiolaning ta’kidlashicha, Xusanov mashg‘ulotlarda yaxshi ishtirok etmoqda va o‘z ishiga to‘liq e’tibor qaratgan. «U uchun bu yerdagi barcha narsa yangi», — dedi murabbiy.

Shuningdek, Gvardiola futbolchini oldingi o‘yindagi xatolari uchun ayblamasligini ta’kidladi. «Har qanday markaziy himoyachi xatolarga yo‘l qo‘yadi. Yuqori darajada o‘ynash kerak, lekin bu vaqt talab etadi. Agar ayblash kerak bo‘lsa, o‘zimni ayblashim kerak, chunki xatolarga yo‘l qo‘yayotgan menman», — dedi u.

Murabbiy Xusanovni «Chelsi»ga qarshi o‘yindagi muvaffaqiyatsiz vaziyatlar uchun tanqid qilmaganini qo‘shimcha qildi.

«U o‘yindan oldin atigi bitta mashg‘ulotda ishtirok etdi va yangi jamoada, boshqa tilda gaplashiladigan mamlakatda harakat qildi. Bunday vaziyatda men ham APLdagi debyutimda yordamga muhtoj bo‘lardim. Shu narsa sodir bo‘ldi: jamoadoshlari zudlik bilan uni qo‘llab-quvvatlashdi», — dedi Gvardiola.

«Manchester Siti» sardori Kevin de Bryuyne ham Xusanov haqida fikr bildirdi. «Bizda himoyachilar qolmagan edi, shuning uchun Abduqodir "Chelsi"ga qarshi asosiy tarkibda maydonga tushdi. U uchun ilk besh daqiqa qiyin kechdi, ammo keyin o‘zini tiklab oldi. U 20 yoshida bu murakkab vaziyatdan chiqib ketgani bilan faxrlanishi kerak», — dedi yarim himoyachi.

«Manchester Siti» va «Arsenal» o‘rtasidagi uchrashuv 2-fevral kuni Toshkent vaqti bilan 21:30 da start oladi.