Toshkent, O‘zbekiston (UzDaily.uz) — 26-fevral kuni investitsiyalar, sanoat va savdo vaziri o‘rinbosari Ilzat Kasimov Germaniyaning BioConsult va ProTecBird kompaniyalari vakillari bilan uchrashdi.

Suhbatda sunʼiy intellekt va katta maʼlumotlar tahliliga asoslangan dasturiy taʼminotni ishlab chiqish, shuningdek, shamol elektr stansiyalari faoliyatiga xalaqit beradigan qushlar toʻqnashuvining oldini olish tizimini joriy etish boʻyicha hamkorlik istiqbollari muhokama qilindi.

Xorijiy tomon vakillari “AVES Wind” tizimini taqdim etib, uning qushlarni kunduzi ham, kechasi ham real vaqt rejimida aniqlash hamda texnologiyani O‘zbekistonning mahalliy sharoitiga moslashtirish imkoniyatlarini namoyish etdi.

Taqdimot davomida tizimning texnik tavsiflari, uning aniqligi va samaradorligi ko‘rib chiqilib, texnologiyani O‘zbekistonning iqlim va ekologik sharoitlariga moslashtirish imkoniyatlari, jumladan, qushlar migratsiyasining o‘ziga xos yo‘nalishlari va mamlakatning normativ-huquqiy talablari muhokama qilindi.

Shamol elektr stansiyalarining bioxilma-xillikka salbiy ta’sirini kamaytirish, ayniqsa, noyob va ko‘chmanchi qush turlarini saqlab qolish nuqtai nazaridan zamonaviy texnologiyalarni joriy etish muhimligi ta’kidlandi. Bundan tashqari, shamol energiyasining atrof-muhitga ta'sirini tahlil qilish uchun ilmiy tadqiqotlar va ma'lumotlar almashinuvi sohasidagi hamkorlik istiqbollari muhokama qilindi.

ProTecBird vakillari O‘zbekistonda rasmiy vakolatxona ochishga tayyor ekanliklarini bildirdilar.

Ofis jamoasini shakllantirish masalalari, jumladan, mutaxassislarni tanlash va tayyorlash, ilmiy-tadqiqot faoliyati uchun zarur shart-sharoitlarni yaratish, shuningdek, mahalliy oliy o‘quv yurtlari va ilmiy markazlar bilan mumkin bo‘lgan hamkorlik masalalari tahlil qilindi.

Bundan tashqari, O‘zbekistondagi ofisdan ProTecBird kompaniyasining Markaziy Osiyodagi faoliyatini yanada kengaytirish uchun strategik markaz sifatida foydalanish imkoniyatlari muhokama qilindi.

Uchrashuv yakunlari bo‘yicha tomonlar ProTecBird texnologiyalarini O‘zbekistonda joriy etish bo‘yicha navbatdagi tadbirlarni bo‘yicha kelishib oldilar.