Toshkent, O‘zbekiston (UzDaily.uz) — Yaponiyaning Osaka shahrida bo‘lib o‘tayotgan xalqaro Expo 2025 ko‘rgazmasi doirasida O‘zbekiston Milliy kuni nishonlandi. Tadbir dasturi doirasida milliy raqslar, konsertlar, parad va rasmiy marosimlar tashkil etildi.

Tantanali marosimda ikki davlatning davlat madhiyalari ijro etildi, rasmiy delegatsiyalar ishtirok etdi. Madaniyat va sanʼatni rivojlantirish jamg‘armasi rahbari Gayane Umerova taʼkidlashicha, O‘zbekiston pavilyonini 500 mingdan ortiq kishi ziyorat qilgan. Shuningdek, u mazkur pavilyon nufuzli Red Dot: Best of the Best mukofotiga sazovor bo‘lganini qayd etdi.

Bundan tashqari, 2027 yilda Nara Milliy muzeyida Buyuk Ipak yo‘liga bag‘ishlangan ko‘rgazmani tashkil etish bo‘yicha memorandum imzolandi. Hujjat muzeylar, akademik hamjamiyat va ekspertlar o‘rtasidagi hamkorlikni kengaytirishni nazarda tutadi.

Expo yakunlangandan so‘ng O‘zbekiston pavilyoni Nuqusga ko‘chiriladi va u yerda taʼlim markaziga aylantiriladi.