Toshkent, O‘zbekiston (UzDaily.uz) — 2024 yil yakuniga ko‘ra, O‘zbekiston Amerika Qo‘shma Shtatlari tomonidan sayyohlik va ishbilarmonlik maqsadida beriladigan B1/B2 turdagi vizalarni olishda rad etilganlar ulushi bo‘yicha Markaziy Osiyoda eng yuqori ko‘rsatkichni qayd etdi. Bu haqda AQSH Davlat departamentining hisobotida maʼlum qilindi.

Hisobotga ko‘ra, O‘zbekiston fuqarolarining vizalarga murojaatlari 64,41% holatda rad etilgan — bu butun mintaqa bo‘yicha eng yuqori ko‘rsatkich hisoblanadi.

Ikkinchi o‘rinda Turkmaniston joy olgan — bu yerda vizalarni rad etish ko‘rsatkichi 58,80% ni tashkil qilgan. Uchinchi o‘rinda Qozog‘iston (46,29%), so‘ngra Tojikiston (45,24%) va Qirg‘iziston (39,14%) qayd etilgan.

AQSH Davlat departamenti maʼlumotlariga ko‘ra, Markaziy Osiyo mamlakatlari orasida vizalarni tasdiqlash darajasida sezilarli farqlar mavjud. Shunga qaramasdan, 2024 yilda O‘zbekiston AQSHning B1/B2 vizalari bo‘yicha rad etilganlar soni bo‘yicha mintaqada eng yuqori natijani qayd etdi.