Toshkent, O‘zbekiston (UzDaily.uz) — «Milliy tiklanish» partiyasi fraksiyasining yig‘ilishida uning yetakchisi Alisher Qodirov Energetika vazirligining faoliyatidan noroziligini bildirib, uning axborot siyosati past darajada ekanini taʼkidladi.

Qodirovning so‘zlariga ko‘ra, jamiyatda energetika sohasiga doir shikoyatlar va tushunmovchiliklar ko‘paygani sababli ijtimoiy tarmoqlarda keng tanqidlar kuzatilmoqda. Bundan tashqari, bu mavzuda faqat mutaxassislar emas, balki bu sohadan umuman xabari yo‘q odamlar ham munozara olib bormoqda.

Partiya yetakchisining fikricha, bunday holatning asosiy sabablaridan biri – vazirlikning aholiga maʼlumotni samarali yetkaza olmasligi. «Hozirgi kunda elektr energiyasining 75% tabiiy gaz yoqish orqali ishlab chiqarilayotganini kim tushuntirib beradi? Energetika tarmog‘idagi muammolar, yashil energetikani rivojlantirish choralari va amalga oshirilayotgan yirik loyihalar haqida kim gapiradi?» — deya savol qo‘ydi Qodirov.

Shuni taʼkidlash joizki, yanvar oyi oxirida siyosatchi energetika masalasini ko‘tarib, aholini gaz bilan isitishdan voz kechib, elektr energiyasiga o‘tishga chaqirgan edi. O‘shanda u bir kub metr gazni qayta ishlab, uning asosida o‘n turdagi yuqori qiymatli eksport mahsulotlarini tayyorlash, xorijga sotish va shu orqali mamlakatda millionlab ish o‘rinlari yaratish mumkinligini taʼkidlagan edi.