Toshkent, O‘zbekiston (UzDaily.uz) — Afg‘oniston Transport va fuqaro aviatsiyasi vazirligi qo‘shni hamda mintaqaviy davlatlarda transport attashelarini tayinlash rejasi haqida eʼlon qildi.

OAV xabarlariga ko‘ra, yangi vakillar O‘zbekiston, Eron, Pokiston, Turkmaniston va Tojikistonda faoliyat yuritadi.

Afg‘on tomoni maʼlumotlariga ko‘ra, mazkur tashabbusning asosiy maqsadi savdoni rivojlantirish, tranzit jarayonlarini soddalashtirish hamda afg‘on tadbirkorlari uchun xalqaro bozorlarda kengroq imkoniyatlar yaratishdan iborat.

Afg‘oniston import va eksportni taʼminlashda asosan qo‘shni davlatlar orqali amalga oshiriladigan avtomobil tashuvlariga katta darajada bog‘liq.

Shu munosabat bilan savdo koridorlari va mintaqaviy kelishuvlar mamlakatning jahon iqtisodiyotiga integratsiyasi hamda eksport salohiyatini oshirishning muhim vositasi sifatida ko‘rilmoqda.