Toshkent, O‘zbekiston (UzDaily.uz) — Turkmaniston Prezidenti Serdar Berdimuhamedov O‘zbekiston Respublikasi Prezidenti huzuridagi Xavfsizlik kengashi kotibi o‘rinbosari Abdulaziz Kamilovni Hormatly il ýaşulusy (“Faxriy xalq oqsoqoli”) unvoni bilan taqdirladi.

Ushbu unvon Turkmaniston va O‘zbekiston o‘rtasidagi do‘stlik va hamkorlikni mustahkamlashga qo‘shgan katta hissasi uchun berilgan.

Turkmaniston Prezidenti farmonida Kamilovning milliy an’analarni rivojlantirish, yosh avlodni tarbiyalash hamda siyosat, iqtisodiyot, fan va madaniyat sohalaridagi hamkorlikni kengaytirishdagi xizmatlari ta’kidlangan.

Maxtumquli Frag‘oning 300-yilligiga bag‘ishlangan tadbirlar munosabati bilan Kamilov yubiley medali "Magtymguly Pyragynyň 300 ýyllygyna" va esdalik nishoni bilan ham taqdirlandi.