Toshkent, O‘zbekiston (UzDaily.uz) — Toshkent shahrida mavjud elektr tarmoqlaridagi cheklovlarni bartaraf etish va energetika infratuzilmasini jadal rivojlantirish rejalashtirilgan. Bu haqda “O‘zbekiston 24” telekanaliga bergan intervyusida qurilish va uy-joy kommunal xo‘jaligi vaziri Sherzod Xidoyatov maʼlum qildi.

Uning so‘zlariga ko‘ra, joriy yil 8 avgust kuni bo‘lib o‘tgan uchrashuvda O‘zbekiston Prezidenti Shavkat Mirziyoyev poytaxt elektr tarmoqlarini 2030 yilgacha rivojlantirish strategiyasida nazarda tutilgan barcha chora-tadbirlarni amalga oshirish bo‘yicha aniq topshiriqlar bergan.

Vazir taʼkidlaganidek, davlat rahbari Toshkentdagi mavjud elektr taʼminoti cheklovlarini bartaraf etish, tarmoqlarni rivojlantirish va 2030 yilga qadar barcha ishlarni to‘liq amalga oshirish vazifasini qo‘ygan. Shu munosabat bilan tegishli taqdimot ham o‘tkazilgan.

Xidoyatovning aytishicha, joriy yilning o‘zidayoq mavjud cheklovlarni yo‘qotish va “elektr halqa” deb ataluvchi — shaharning barcha tumanlarida barqaror energiya yetkazib berishni taʼminlaydigan yopiq elektr taʼminoti tizimini yaratish imkonini beruvchi tizim joriy etiladi.

Shaharning barcha tumanlarida elektr energiyasi uzilishiga yo‘l qo‘ymaslik uchun transformatorlar va podstansiyalar yuklamasini hisobga olgan holda tarmoq ishini optimallashtirish bo‘yicha aniq choralarni o‘z ichiga oluvchi raqamli boshqaruv tizimini joriy etish bo‘yicha ko‘rsatmalar berilgan.

Shuningdek, vazir taʼkidlaganidek, endilikda har qanday turdagi — turar-joy, tijorat yoki boshqa inshootlar qurilishi uchun ruxsat berishdan oldin zarur elektr energiyasi hajmi baholanadi. Bu ehtiyoj kafolatli tarzda taʼminlanishi shart va loyihalar talab etilgan quvvatlardan kelib chiqib amalga oshiriladi.

Energetika vazirligi bilan hamkorlikda ushbu ishlar integratsiya qilinib, raqamlashtiriladi: elektr tarmoqlariga ulanish uchun texnik shartlar onlayn tarzda beriladi, qurilish jarayoni esa barcha bosqichlarda zarur elektr taʼminoti bilan taʼminlash shartlariga muvofiq kelishiladi.