ФАО тупроқшуносликда ГИС технологияларини жорий этмоқда

Тупроқшунослик ва агрокимё илмий тадқиқот институтида «Марказий Осиё ва Туркиянинг қурғоқчил ва шўрланган қишлоқ хўжалиги ишлаб чиқариш ландшафтларида табиий ресурсларни комплекс бошқариш» (CACILM-2) минтақавий лойиҳаси доирасида Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) кўмагида ташкил этилган янги географик ахборот тизимлари (ГИС) лабораториясининг очилиш маросими бўлиб ўтди. Янги ГИС лабораторияси энг замонавий компьютерлар, сервер (маълумотлар маркази), плоттер (тупроқ хариталарини чоп этиш қурилмаси) ва GPS жиҳози билан жиҳозланган.

Очилиш маросимида мутахассислар янги лабораториянинг мақсад ва вазифалари, шунингдек, унинг ишлаш принциплари бўйича тақдимотлар ўтказишди. Илмий ходимлари энг сўнги технологиялар асосида жиҳозланган янги лабораториянинг имкониятлари билан таништирилди.

Тупроқ дунё биологик хилма-хиллигининг асосий манбаларидан бири бўлиб, биз истеъмол қиладиган озиқ-овқатнинг 95 фоизи айнан тупроқда етиштирилиши таъкидланди. Бундан ташқари, қуруқликда яшовчи организмларнинг 40 фоиздан ортиғи ўз ҳаётининг у ёки бу босқичида тупроқ билан бевосита боғлиқ бўлади. Тупроқ саломатлигини тиклаш Барқарор ривожланиш мақсадларига эришиш учун муҳим ва муҳим ҳисобланади.

«Янги ГИС лабораторияси бу йўналишдаги ишларни такомиллаштиради. Геоахборот технологиялари ерларнинг деградация жараёнларини баҳолаш ва хариталаш, тупроқлар ҳолатини таҳлил қилишнинг самарадор ва тезкор ахборот тизимларини яратиш, тупроқ хариталаш ишларини, анъанавий хариталаш усулларини замонавий компьютерлаштириш, тадқиқ этиладиган ҳудуд тўғрисида тез ва сифатли маълумот олиш, геоахборот технологияларини қўллаган ҳолда масофадан зондлаш маълумотларига ишлов бериш орқали кўп йиллик мониторинг ишларини олиб боришга доир илмий-тадқиқотларни амалга оширишда бир қатор имкониятлар яратади ҳамда ер деградациясини бартараф етиш бўйича лойиҳаларни амалга оширишга ёрдам беради», дея таъкидлади лойиҳа миллий бошқарувчиси Муҳаммаджон Қосимов.

Тақдим этилган ГИС лабораториясидан илмий, амалий ва тадқиқот мақсадларида фойдаланилади. Тупроқшунослик ва агрокимё илмий-тадқиқот институти вакиллари ФАОга уларнинг фаолияти учун катта имкониятлар очаётган янги иншоот яратилгани учун миннатдорлик билдирди.

Марказий Осиё ва Туркиянинг қурғоқчил ва шўрланган қишлоқ хўжалиги ишлаб чиқариш ландшафтларида ердан фойдаланишни яхшилаш, иқлим ўзгариши оқибатларини юмшатиш ҳамда табиий ресурсларни комплекс бошқариш бўйича амалиётлар кўламини кенгайтириш CACILM-2 лойиҳасининг асосий мақсади ҳисобланади. Ушбу лойиҳанинг амалга оширилиши БМТнинг қурғоқчилик ва чўлланишга қарши курашиш конвенцияси ва БМТнинг Иқлим ўзгариши тўғрисидаги асосий конвенциясини амалга оширишга ҳам салмоқли ҳисса қўшмоқда. Қишлоқ хўжалиги вазирлиги, Сув хўжалиги вазирлиги, Ўзбекистон Республикаси Ўрмон хўжалиги давлат қўмитаси ва Ўзбекистон Республикаси Экология ва атроф-муҳитни муҳофаза қилиш давлат қўмитаси Ўзбекистонда лойиҳа ҳамкорлари ҳисобланадилар