Ўзбекистоннинг сайёҳлик компаниялари Хитойда музокаралар олиб боришади
05/07/2016 14:43
Ўзбекистоннинг сайёҳлик компаниялари Хитойда музокаралар олиб боришади
Тошкент, Ўзбекистон (UzDaily.uz) -- Ўзбекистоннинг сайёҳлик компанияларидан иборат делегацияси 2016-йилнинг август ойида Хитойга ташриф буюриб, мазкур мамлакатнинг сайёҳлик бизнеси вакиллари билан ҳамкорликни ривожлантириш борасида музокаралар олиб боришади.
“Ўзбектуризм” МК Пекин шаҳридаги Ўзбекистон Республикаси Элчихонаси ҳамда Шанхай шаҳридаги Бош консуллигининг кўмагида 2016-йилнинг август ойида Пекин ва Шанхай шаҳарларида ишчи учрашувларни ташкиллаштириш бўйича иш олиб бормоқда.
Тадбирда Ўзбекистон Республикасининг 20 та сайёҳлик компанияси ҳамда Хитой Халқ Республикасининг 100 дан ортиқ сайёҳлик компанияларининг иштирок этилиши режалаштирилмоқда, дея хабар беради “Ўзбектуризм” МК Матбуот хизмати.
Ташриф дастури доирасида Ўзбекистон Республикасининг сайёҳлик салоҳияти тақдимоти, шунингдек, хитойлик сайёҳларни Ўзбекистонга жалб этишга қаратилган ишчи руҳдаги музокаралар ҳам ўтказилади.
