ШҲТ кузатувчилар миссияси Ўзбекистонга келди

Тошкент, Ўзбекистон (UzDaily.uz) -- Шанхай ҳамкорлик ташкилотининг (ШҲТ) Ўзбекистон Республикаси Президенти сайловига тайёргарлик кўриш ва уни ўтказиш жараёнини кузатиш бўйича миссияси кузатувчилари 2016-йил 30-ноябрь куни мамлакатимизга келди. Унга ШҲТ Бош котиби Рашид Алимов раҳбарлик қилмоқда. Бу ҳақда ЎзР ТИВ Матбуот хизмати хабар беради.

ШҲТ миссияси Ўзбекистон Республикаси Марказий сайлов комиссияси томонидан Президент сайловига халқаро кузатувчилар таклиф этилишини уни демократик тамойиллар асосида, очиқ ва ошкора ўтказишга бўлган интилишнинг яққол ифодаси, деб баҳолайди.

Миссия ўз фаолиятини Ўзбекистон Республикаси қонун ҳужжатларига ҳамда Президент ва парламент сайловларида, референдумларда ШҲТ кузатувчилар миссияси тўғрисидаги низом асосида сиёсий бетарафлик ва давлатнинг ички ишларига аралашмаслик тамойилларига риоя қилган ҳолда амалга оширади.

Унинг таркибига ШҲТга аъзо давлатларнинг қонун чиқарувчи, ижро ва сайлов органлари, шунингдек, ШҲТ котибиятининг 20 нафар вакили киритилган. Улар ўз фаолияти давомида иложи борича кўпроқ сайлов участкаларига ташриф буюришни режалаштирмоқда.

Миссия Ўзбекистон Республикаси Марказий сайлов комиссияси, Ташқи ишлар вазирлиги, Жаҳон иқтисодиёти ва дипломатия университетида учрашувлар ўтказади. Сайлов комиссиялари, сиёсий партиялар, оммавий ахборот воситалари вакиллари, халқаро ташкилотлар миссиялари аъзолари, хорижий мамлакатлар кузатувчилари билан мулоқотлар ўтказишни режалаштирган, деб хабар беради ЎзА.

ШҲТда сайловларни кузатиш соҳасида катта тажриба тўпланган. Бу борада ташкилотда 2004-йилдан буён 37 миссия шакллантирилган бўлиб, уларнинг 5 таси мамлакатимизда иш олиб борган.